هل بالفعل مجموعة هاكرز إيرانية بإسم Lyceum اختارقات شركة تزويد خدمة الأنترنت بالمغرب

 

شفت بزاف ديال الجرائد الإلكترونية اللي معروفة في المغرب نشرات خبر أنه واحد المجموعة ديال الهاكرز إيرانيين بإسم Lyceum كيهجمو على شركات الإتصالات وتزويد الخدمات المغربية 🇲🇦

وكيف ديما فاش كنشوف شي خبر بحال هذا مكانجيش ونتيقو فقط حيث نشراتو جريدة إخبارية موثوقة حيث للأسف كلهم مكاينش فيهم شي واحد اللي مختص في الهاكينغ اللي غادي يأكد ليهم ديك الهضرة واللي غادي يخليني نتيقها... 🤷

لهذا مشيت قلبت على هاد التقرير اللي خرج واللي كيقول هادشي باش نشوف واش هادشي بصح.

اللي هو هذا :👇

https://www.accenture.com/us-en/blogs/cyber-defense/iran-based-lyceum-campaigns

في هاد التقرير اللي خرجاتو شركة Accenture اللي كدير تحليل للهجمات الإلكترونية واللي المقر ديالها في إيرلاندا، قالت فيه باللي أنه شركات الإتصالات وتزويد خدمة الأنترنيت في المغرب - إسرائيل - تونس - المملكة العربية السعودية وحتى وزارة الخارجية (MFA) في أفريقيا مستهدفة من واحد المجموعة ديال الهاكرز إيرانية بإسم Lyceum، وهادشي ما بين يوليو و أكتوبر 2021.

ماشي غير مستهدفة بل قالت مخترقة ولقاو مؤشرات الإختراق "IOCs"...

====

ولكن واش هادشي بصح 🤔

====

فاش قريت التقرير ديالهم هما، قالو باللي لقاو شي إتصالات ديال واحد الBackdoor جايين من واحد الأيبي ديال واحد شركة تزويد خدمة الأنترنيت مغربية...

ولكن من بعد في وسط التقرير كتبو هادي :

"It is unknown if the Milan backdoor beacons are coming from a customer of the Moroccan telecommunication operator or from internal systems within the operator"

أي قالو باللي معارفينش أصلا واش داك الأيبي جاي من شي مستخدم ديال هاد شركة الأنترنيت أو ديال الشركة براسها هههههه 😂😂😂

يعني شركة على قدها كتقول باللي أنه ثم إختراق شركات الإتصال ومعارفاش حتى كيفاش تفرق ما بين أيبي ديال شخص أو ديال الشركة براسها 🤦

يعني هنا غير كالسة كطيح الباطل على شركات الإتصال 🤦

====

بحيث أنه ساهلة باش تعرف واش الأيبي ديال شي شخص أولا لا، عن طريق أنهم يقلبو في الASN ديال شركة الإتصال وتماك غادي يعرفو واش الأيبي تابع للمستخدمين أو معطي للشركة.

====

اللي معارفش الASN هو إختصار لAutonomous System Number واللي باينة من سميتو باللي هو واحد الرقم فريد واللي معرف دوليا اللي كيحدد واحد مجموعة ديال الأيبيهات شكون شادها ولمن معطية.

هاد الڤيديو تقريبي للطريقة اللي قصدت في هاد البوسط اللي غادي تفهموه بيه "الڤيديو بالإنجليزية" :

https://www.youtube.com/watch?v=gVGHaiB9qo4

====

في رأيي أنه هاد الخبر ماشي صحيح حيث مزال ممعروف شكون مول داك الأيبي اللي هما داوين عليه... لهذا يقدر يكون غير ديال شي شخص أو موقع وهما ملصقينها في شركات الإتصال المغربية.

====

وللأسف مواقع إخبارية كبار في المغرب واللي موثوقة كالسين كينشرو في الخبر بدون مايتأكدو من الصحة ديالو 🤦

يكفي أنك تكتب في جووجل "هاكرز إيرانيون يستهدفون المغرب" وغادي تلقاوهم 🤦

▪ ورسالة ليهم :

إلى مكنتوش كتفهمو في المجال على الأقل سولو شي واحد اللي فاهم فيه ويعرف يحلل البوسط أشنو فيه قبل متنشرو معلومات غالطة ✌️

====

وفي الأخير شكرا لأنك وصلتي حتال لهنا وقريتي البوسط، متنساش Tagi الناس اللي غادي يعجبهم، وتشجعنا بالمتابعة ديالك